ENTREVISTO DÓU MAJORAU REVEST
(En blu sei responso !)
1 - Qué associacion, o qué associacions, a o an agut l'idea de l'exposicion ?
Lis assouciacioun participanto: La Rafelenco ; assouciacioun mountado au lendeman de la Santo Estello de Sant Rafèu de pèr la voulounta dou counse ajoun à la culturo dóu moumen en 98.
2- Qu son li parternaris ? (Poders publics ? mediàteca ?). M'a dich Dòna Roux qu'un cartofile avia prestat de cartetas e de fac simile...me'n pòdes dire de mai ?
Li Partenàri : La Rafelenco a travaia emé l'ajudo d'uno suvencioun de la coumuno de Sant Rafèu qu'a en mai douna l'autourisacioun pèr que la mediatèco dóu Centre Culturau nous aculiguèsse à gratis dins lou siéu. Lou Felibrige Varés a participa i fres d'animacioun d'aquéli quinge jour e a realisa e paga lis aficho de fourmat A3 e A5. Li mai grando que se vesién au centre fuguèron imprimado pèr la coumuno de Sant Rafèu. Lou Felibrige dounè soun agramen pèr aquelo manifestacioun.
3 - Qu a dubèrt o inaugurat l'exposicion ? Qué personalitats políticas e dau militantisme regionaliste eran presentei ?
La manifestacioun fuguè duberto pèr lou conse ajoun de la ville en coumpagno de l'ajounc à la culturo. Lou presidènt de la Rafelenco e iéu meme que prenguère la paraulo au noum dou Capoulié.
4 - Me pòdes dire doas paraulaus de la conferéncia d'acompanhament de JuanLuc Domenge ? I son aguas d'autrei conferéncias e intervencions ?
La counferènço de J Lu Domenge sigue lou dissate davans un publi noun Felibre e pèr uno bono part noun praticant de la lengo nostro. Se trouvavo aperaqui un centenau de persouno.
5 - Quant de visitaires au jorn d'ancuei ? I aguet de vesitas escolàrias ? Me pòs parlar dals panèls qu'an fach li pichons dals escòlas ?
Li vesitour : Ai gaire d'idèio aqui suto estènt que la majo part di vesitaire èron li gènt que venien au centre culturau escoulàri vo adulte.
6 - Cen que son li ponchs màgers de l'exposicion ?
Li pount pousitiéu : aqui parié pas gaire d'idèio, ço qu'espère es que lou Felibrige ague pas moustra soun nas pèr rèn. Pèr aro veici: un parti pouliti a demanda que se venguesse parla dou Felibrige dins la seicioun loucalo à la primo de 2005. Lou Centre Culturau nous a di que voulié assaja, emé nosto ajudo, de mounta un proujet coume à La Loundo (conte, legendo) dins l'annado à veni dins l'encastre dóu travai sus la biblioutèco di pichot.
7 - Es previst que vire entorn dau país, l'exposicion ?
Barrulage : Rèn es previst pèr l'espousicioun de Sant Rafèu e lou Felibrige. Soun autour, Pèire Nicolini la devié demounta tre l'endeman pèr travaia sus uno nouvello espousicioun pèr lou museum de Freju que n'es lou Presidènt. Pèr lis espousicioun di drole la vau rèndre à l'escolo de La Loundo e sabe pas ço que n'en faran.
Aquelo sus Mirèio e sus lou Felibrige, soun mieuno, e quouro aurai besoun di cadre, li demountarai.
Un gran mercés au Majourau Revest !
Comprenèm aicí que l'exposicion, per professionala que semble, es per màger part d'origina associativa e escolària...e qu'en fach, son tres exposicions en una qu'avèm vistas !
Òsca a tota l'equipa dau Felibrige varés qu'a trabalhat emb eficacitat a l'annada Mistral !
Copyright © par Calliope 21. Tous droits réservés.
